The lovely Lass O’ Inverness Written In 1794 By Robert Burns

 

The lovely Lass O’ Inverness

The lovely Lass o' Inverness,

Nae joy nor pleasure can she see;

For, e'en and morn she cries, Alas!

And aye the saut tear blins her e'e.

Drumossie moor, Drumossie day,

A waefu' day it was to me;

For there I lost my father dear,

My father dear and brethren three.

Their winding-sheet the bluidy clay,

Their graves are growin' green to see;

And by them lies the dearest lad

That ever blest a woman's e'e!

Now wae to thee, thou cruel lord,

A bludy man I trow thou be;

For mony a heart thou has made sair,

That ne'er did wrang to thine or thee!

Written In 1794 By Robert Burns